"සම්බුදුවරුණ" පින්කමේදී පූජා කෙරෙන සුගත චීවරය පඩු පෙවීමේ අසිරිමත් පින්කම

බොහෝ කල් හිතසුව පිණිස පවතින කුසල් සිත් නිරන්තරයෙන් ජනිත කිරීමට උපකාර වන අසිරිමත් පින්කමක් අද දින අපට සිදුකර ගැනීමට හැකි වූවා. බුදුගුණ සිහිකරමින් බුද්ධාලම්භන ප්‍රීතියෙන් යුතුව බුදුරජාණන් වහන්සේ උදෙසා සුගත චීවරයක් පඬු ගසා සකස් කිරීමට අපට හැකි විය.

පඬු පෙවීම සඳහා අවශ්‍ය ද්‍රව්‍ය වන්නේ,
මහෝගනී හෝ කොස් පොතු
පඩු ඔරුව
විනයානූකූලව මසන ලද චීවරය
පඬුපොවන ආකාරය

පළමුව මේ සඳහා කොස් පොතු ඉතාමත් සිහින් ලෙස කොටා එම කොටාගත් මහෝගනී බොහෝ වෙලාවක් තම්බා ගැනීම සිදු කළ යුතුවේ.
ඉන්පසු චීවරය මනාව ඔතා පඬු ඔරුවේ තැන්පත් කළ යුතුවේ.
ඉන්පසු තම්බාගත් මහෝගනී දියර පෙරහන්කඩයකින් පෙරමින් මනාව චීවරය මතට දමන අතර ඒ කාලයේදීම චීවරය රෝල් කරමින් පඩු ඔරුවේ ඉදිරියට ගෙනා ආ යුතුය.
එලෙසම අනෙක් පසද පඬු තවරමින් රෝල් කරමින් මනාව පඬු ගැසීම සිදුකළ යුතුවේ.
ඉන්පසු එම චීවරය හොඳින් අව්වේ වේලා ගත යුතුවේ.
චීවරය වේලා නිම වූ පසු නැවත ඉහත පරිදි 3 වතාවක් හෝ 4 වතාවක් හෝ පඬු ගැසිය යුතුවේ.
මෙම පඬු ගැසීමේදී අප පඬු ඔරුව වෙනුවට භාජනයක් තුළ පඬු සකස් කර චීවරයට පඩු පෙවීම පත්තක් ආධාරයෙන් සිදුකරන ලදී ..
පින්වත් ස්වාමින් වහන්සේලා උදෙසා කෘමි උවදුරු වලින් තොරව ඉතා සුවපහසු ලෙස නිවන් මග වඩමින් බොහෝ කාලයක් පරි ශීලනය කිරීමට මෙම විනයානුකූලව අතීතයේ චාරිත්‍රානුකූලවම පඬු පොවන ලද චීවරයන් උපකාරී වනු නිසැකය. යුගයේ අසිරිමත් පින්කම් පෙළහරක සමාරම්භය සනිටුහන් කරමින්, මහියංගන පුණ්‍ය භූමියේ දී මාර්තු මස 07 වන දින පින්වත් බලංගොඩ රාධ ස්වාමීන් වහන්සේගේ සුමධුර ස්වරයෙන් නිම්නාද වන “සම්බුදුවරුණ” පින්කමේදී පූජා කිරීමට නියමිත සුගත චීවරය විනයානුකූලව අපගේ දෑතින්ම පඬුපොවා සකස් කිරීමට ලැබීම මොනතරම් භාග්‍යක්ද,

වියකීයන අපගේ ශ්‍රී විභූතිය නැවත සමාජ ගත කරනු වස් ඉමහත් ශ්‍රද්ධාවෙන් සංවිධානය කරනු ලබන මෙම “සම්බුදුවරුණ ” පින්කම් මාලාවේ මූලික අරමුණු වනුයේ,

අතීතයේ තුන්යම් රාත්‍රියක් පුරා පැවැත්වූ බුදුගුණ දේශනා කිරීමේ මා හැගි පුන්‍ය කටයුත්ත නැවත සමාජ ගත කිරීම.
සොළොස්මස්ථාන මුලික කරගෙන ඒ අවට වෙහෙර විහාරස්ථාන ප්‍රතිසංස්කරනය, ප්‍රත්‍ය පහසුකම් සැපයීම හා වැඩි දි‍යුණු කිරීම.
ප්‍රවාහන පහසුකම් සහ මුලික අවශ්‍යතා සපුරාලමින් දුශ්කර ප්‍රදේශවල වාසය කරන ජනතාවගේ සිත්තුළ බුද්ධාලම්භන ප්‍රීතිය සහ ශ්‍රද්ධාව ඇති කිරීම, ධර්ම මාර්ගයට යොමු කිරීම.

මෙම අසිරිමත් බුදු ගුණ දේශනාවට පෙරාතුව

ග්‍රීවා ධාතුන් වහන්සේගේ අනුරුවක් ද කේශ ධාතූන් වහන්සේලා ද රාජකීය පෙරහැරකින් වැඩම වීම.
ආදිවාසීන් විසින් සිදු කරන මී පැණි පූජාව.
ගුවනින් පුෂ්පෝපහාර දැක්වීම.
සක් පූජාවන්ගෙන් සෑ රජුන් පිදීම.
රෝස මල් කංචුකය පැලද වීම.
සුමන සමන් දිව්‍ය රාජයා වන්දනා කරමින් සිටින පිළිරුව අසල පිහිටි නේක විසිතුරු මල් මණ්ඩපය මත භාග්‍යවතුන් වහන්සේ වඩා හිඳුවීම.
සුවඳ දුමින් සෑ රජුන් පිදීම.
සෑ රජුන් විදුලි බුබුලින් ආලෝකමත් කිරීම
පැමිනෙන සියලු දෙනාට දන්සැල්
ආදී කොට ගත් නේක විධ පූජාවන්ගෙන් අනතුරුව සවස 6 සිට පසුදා පහන් වනතුරු තුන් යම පුරා “සම්බුදුවරුණ” බුදුගුණ දේශනය පැවැත්වෙන අතර සවන් පුරා ශ්‍රවණය කොට අපමණ පින් රැස්කර ගැනීමට පිංවත් ඔබ සැමට සැදැහිසිතින් ආරාධනා……
“සම්බුදුවරුණ” පිංකමට සමගාමීව සිදු කළ මෙම අසිරිමත් පින්කමෙන් ජනිත වූ සියලු පුණ්‍ය ධර්මයෝ මෙම පිංකම සදහා අවස්තාව සලසා දුන් අමත රතන සෙනසුනේ රතන ස්වාමින් වහන්සේ ඇතුලු සියලු ස්වාමින් වහන්සේලාටද ,ආහාර පාන සලසා දුන් අමිල අයියා ඇතුලු සියලු දෙනාටද ,,කාය පූජාවෙන් දායකත්වය දැක් වූ සියලු මිතුරන්ටද
” සසුන් කෙත අස්වද්දමු” මිතුරු කැලටද ,
” සසුන් කෙත අස්වද්දමු ” පින්කම් සඳහා මුල්‍යමය දායකත්වය ලබා දෙන සියලු පින්වතුන්ටද , පින්කැමති සියල්ලන්ට ද , මෙත් සිතින් යුක්තව රැස්කළ සියලු පින් අනුමෝදන් කරන අතර සියලූම පුණ්‍ය ධර්මයෝ පින් කැමති සියල්ලන් හටම නිවන් පිණිසම හේතුවේවා!

” සසුන් කෙත අස්වද්දමු ” පින්කම් සඳහා ශ්‍රමයෙන් සම්බන්ධ වීම සඳහා..