අද දින හිමිදිරි උදෑසන සම්බන්ධ වීමට හැකි වූ දුර්ලභ පිණ්ඩපාත කාල දානමය පින්කම

සාරිපුත්ත, ආනන්ද , නන්ද , රාහුල ආදී මහරහත් පරපුරෙන් පැවතෙන ආර්ය මහා සංඝරත්නය සිහි කරමින් අද දින 2020.10.04 හිමිදිරි උදෑසන පිණ්ඩපාත කාල දානයක් සිදුකරගැනීමේ අතිශය දුර්ලභ වාසනාව අප හට උදා වූවා.

උතුම් ගුණධර්ම වලින් හෙබි සිල්වත් ලංකාවේ අතිශය දුර්ලභ දුෂ්කර ආරණ්‍ය සේනාසන ගණනාවක වැඩසිටි පූජණීය රාජගිරියේ අරියඤාණ ස්වාමීන් වහන්සේගේ ධර්ම දේශනාව ශ්‍රවණය කරමින් , දානය පූජා කරමින් , පිරිකර පූජා කරමින් දිනය පුරා අප්‍රමාණ පිනක් රැස්කර ගැනීමේ අවස්ථාව අප සැමට උදා වීම භාග්‍යක්මය.

පින්කම් මාලාවෙන් රැස් වූ සියලූම පුණ්‍ය ධර්මයෝ මෙම පින්කම සංවිධානය කළ එම ගම්මානයේ සියලු දෙනාට ද , මා සමග පැමිණි චලිත ඇතුලු මිතුරන් සියලුදෙනාට ද , පින්කම සම්බන්ධීකරණය කර දුන් තේජා අක්කාටද , පින්කැමති සියල්ලන්ට ද , මෙත් සිතින් යුක්තව රැස් කළ සියලු පින් අනුමෝදන් කරන අතර සියලූම පුණ්‍ය ධර්මයෝ පින් කැමති සියල්ලන් හටම නිවන් පිණිසම හේතුවේවා!

පිණ්ඩපාත දානය පූජා කිරීමේ පුණ්‍ය විපාක

“ඒක පිණ්ඩපාත දායිකා” තෙරණින් වහන්සේ එක් භවයක දී පිණ්ඩපාත දානයක් පූජා කර තිබුණි.

අතීත භවයන් වල දී බුදු පියාණන් වහන්සේලා මුණ ගැසෙමින් නිවන් දකින්නට බොහෝ පින්කම් රැස්කර ගනිමින් ආ මෙම තෙරණින් වහන්සේ බන්‍ධුමතී නුවර උපත ලැබුවා ය. තරුණ වයසේ දී එහි සිටි බන්‍ධුමත් නම් රජුගේ බිරිඳ වූවා ය. හැම සම්පතක්ම විඳිමින් සිටිය දී මෙතුමිය දිනක් මෙසේ කල්පනා කළා ය.

” මම මැරෙන විට මොනවද රැගෙන යන්නේ ? මා කරගත් පින්කමක් ද නැත. මරණින් පසු මා බිහිසුණු , කටුක දරුණු නිරයට වැටෙන එක ගැන නම් කිසිම සැකයක් නැහැ. ඒ නිසාම රජු ළඟට ගොස් දානයක් දෙන්නට අවසර ගන්න ඕනෑ.”

මෙසේ සිතා මෙතුමිය රජුව මුණගැසී දානයක් දෙන්නට එක භික්‍ෂුවක් ලබාදෙන්න කියා රජුගෙන් අවසර ඉල්ලීය. රජතුමා අවසර දුන්නේය. නැවත මාළිගාවට ආ මෙතුමිය ප්‍රණීත ආහාරපාන සුවඳ විලවුන් සමඟ වටිනා සළු පිළි ද මේ හැම පූජාවක් සමග මහා පිණ්ඩපාත දානයක් දුන්නේ ය. ඉන්පසු හැම මොහොතකදීම මෙතුමිය සිතුවේ එම මහා දානය ගැනයි. මරණින් පසු උපත ලැබුවේ තවුතිසා දෙවුලොවයි.

විටින් විට දෙවුලොව නැවත උපත ලබන විට දී දෙවිවරු තිහකට අග මෙහෙසිය විය. හැම තැනකදීම ඇය සිතන සිතන ප්‍රර්ථනා ඉෂ්ට විය.

ඉන්පසු විවිධ අවස්ථාවල දී සක්විති රජවරු විස්සකට අග මෙහෙසිය වූවා ය. මීට කල්ප අනූවකට පෙර දුන් ඒ මහා දානයේ ප්‍රතිඵල ලෙස දෙව්ලොව මිනිස් ලොව උපත ලැබූ මෙතුමිය අවසානයෙහි අප බුදුපියාණන් වහන්සේ ලොව පහළ වූ කාලයෙහි මිනිස් ලොව උපත ලබා තරුණ වයසේදී පැවිදි වූවාය.

ටික දිනකින්ම විදර්ශනා වඩා රහත් වූ මෙම තෙරණින් වහන්සේ එක් දිනක් අතීත භවයන් බලමින් අතීතයේ කළ මේ මහා පින්කම ගැන දේශනා කළාය.

– අපදාන කථා, ඒක පිණ්ඩපාත දායිකා ථෙරාපදානය-

” සසුන් කෙත අස්වද්දමු ” පින්කම් සඳහා ශ්‍රමයෙන් සම්බන්ධ වීම සඳහා..